Pòtoprens, 6 me 2025 — Apre jis twa mwa nan tèt Fon Nasyonal Edikasyon an (FNE), Sterline Civil ap voye yon mesaj klè: “Nou pap kontinye sou menm chimen an.” Pandan yon vizit li te fè nan redaksyon jounal Le Nouvelliste, nouvo Direktris Jeneral la te poze kat sou tab epi pataje premye demach li yo pou mete lòd nan fon an, mete limyè sou pratik opak yo, epi trase wout pou yon veritab refòm.
Yon odit depi premye jou yo
Dezòm li te fin pran pòs li, Sterline Civil te bay lòd pou lanse yon odit jeneral sou FNE. Objektif la te klè: fè limyè sou fonksyònman enstitisyon an, wè klè sou estrikti l, epi mezire gravite sitiyasyon finansye a. Rezilta preliminè yo pa bay espwa: move jere, konfizyon administratif, e anpil zafè ki pa klè ni lojik.
An paralèl, tout kontra ak rekritman an kour te sispann, tan pou nouvo ekip la pran tan konprann sa k ap pase anndan kay la.
Yon sitiyasyon finansye alarmant
Sterline Civil pa kache verite a: FNE gen plis dèt pase lajan li ka jere sou yon ane. Pami rezon ki mete fon an anba presyon sa a, li site reta ki fèt nan peman pansyon sivil yo, lajan ijans pou anplwaye yo ki bloke, epi sibvansyon ki te bay men ki difisil pou verifye.
Li ajoute tou gen plizyè konpayi ki pa janm resevwa lajan garanti yo malgre yo te respekte tout kondisyon pou pwojè yo. Sitiyasyon sa a mete an dout bon jan fonksyònman fon an e li rale alèt sou jan resous piblik yo te itilize.
Pwoblèm jesyon andedan an
Anndan FNE, dezòd la pa pi piti. Dapre Direktris la, plizyè direksyon pa menm gen dokiman ki defini sa yo sipoze fè. « Gen anplwaye ki pa menm konnen fonksyon yo » dapre sa li di. Sitiyasyon sa a lakoz anpil konfizyon ak mank efikasite.
Yon plan refòm pou bay fon an kredibilite
Pou remete FNE sou pye, Sterline Civil deja mete sou pye yon plan asenisman finansye. Li mete aksan sou relansman lojisyèl Accpac pou asire bon swivi ak transparans nan jesyon lajan yo. Men plis pase lojisyèl, sa li ap chèche se retabli kredibilite FNE a.
Pou sa rive, li mete priyorite sou bon gouvènans, regleman klè, epi jesyon ouvè ki kapab atire nouvo patnè finansè epi mete FNE tounen yon poto mitan nan politik edikasyon peyi a.
Yon nouvo epòk ap louvri pou FNE.
Avèk apwòch dirèk li, angajman pou transparans, ak volonte pou refòme fon an an fon e an fòm, Sterline Civil montre li pare pou l mennen FNE sou yon lòt wout. Rete pou nou wè si volonte sa ap jwenn sipò ak rezistans li bezwen pou reyisi.
