Nan yon peyi kote edikasyon toujou se yon defi, Sterline Civil, nouvo Direktris Jeneral Fon Nasyonal Edikasyon an (FNE), chwazi mete aksyon konkret pou make 100 premye jou li nan tèt enstitisyon an. Madi 27 me 2025, li te ansanm ak Minis Edikasyon Nasyonal la, Antoine Augustin, pou l inogire kat lekòl piblik nan depatman Nip yo. Lekòl sa yo chita nan lokalite Lièvre, Changeux, Moinsard ak Fond Tortue.
Sterline Civil, ki li menm se pitit tè sa a, di li pa wè inogirasyon sa yo tankou senp livrezon bilding, men kòm yon angajman pou lavni timoun yo. “Se pa sèlman zafè mi ak twati. Se yon batay kont enklizyon sosyal. Se yon esperans pou timoun yo ak fanmi yo,” li te deklare avèk anpil emosyon.
Aksyon sa a se rezilta yon kolaborasyon ant FNE ak Ministè Edikasyon Nasyonal ak Fòmasyon Pwofesyonèl (MENFP). Selon Direktris la, li enpòtan pou se pa Pòtoprens sèlman ki benefisye bon jan estrikti edikatif, men tou zòn riral tankou Nip yo, kote timoun merite menm opòtinite ak tout lòt kote.
Nan bilan 100 premye jou li yo, Sterline Civil mete aksan sou plizyè inisyativ enpòtan :
Minis Edikasyon Nasyonal la, Antoine Augustin, ki te patisipe nan seremoni inogirasyon yo, salye angajman FNE anba direksyon Sterline Civil. Li raple enpòtans pou kominote yo protéje lekòl sa yo epi sèvi avè yo nan respè prensip repibliken. Pou li, lekòl sa yo se siy vizyon yon sistèm edikatif ki pi imèn, plis solidarite, epi plis responsab.
Sterline Civil mete aksan sou volonte li pou rete pre kominote yo, pou l pa limite aksyon li yo nan biwo nan kapital la. “Nou vle tande, nou vle konprann, nou vle aji,” se pawòl li te pataje pandan li t ap pale ak otorite lokal yo.
Finalman, li mete aksan sou wòl edikasyon nan rekonstriksyon sosyal ak nasyonal la, e li kwè ke chak lekòl ki bati se yon pa plis kont ensekirite, inegalite ak povrete. Nan 100 premye jou li yo, Sterline Civil montre ke li kwè nan travay sou teren, nan aksyon ki bay rezilta, ak nan respè diyite chak timoun ayisyen.
