Pòtoprens, 6 me 2025 — Pandan 7yèm edisyon “Madi Nasyon an”, yon randevou gouvènman an mete sou pye chak semèn pou pale ak pèp la, responsab Leta yo mete aksan sou kijan yo ap jere sitiyasyon difisil moun ki oblije kite kay yo akoz vyolans, ansanm ak Ayisyen yo ki ap retounen sòti Repiblik Dominikèn.
Sekretè Deta pou Kominikasyon, Bendjy Tilias, anonse ke Ministè Defans lan resevwa 7 milya goud pou ranfòse mwayen Lame d Ayiti. Gras ak finansman sa a, yo deja bay FAd’H 27 machin transpò sòlda ak 2 kamyon pou kò jeni militè a.
Nan menm sans lan, Minis Afè Sosyal ak Travay, Georges Wilbert Franck, prezante sa ki fèt pou ede fanmi ki viktim ensekirite yo. Daprè li, 26,000 fanmi deja jwenn transfè lajan atravè Pwogram Ijans Milti-sektoryèl la, e gen plizyè aksyon sosyal ak imanitè k ap fèt nan kan deplase yo.
Minis la remèsye Ministè Edikasyon Nasyonal, Ministè Anviwònman, ansanm ak FAES (Fonds d’assistance économique et sociale), ki mete 7 milya goud disponib pou ede ak pwogram sa yo. Li mete aksan sou enpòtans kowòdinasyon ant enstitisyon yo pou reponn ak bezwen imanitè k ap ogmante.
Pami lòt pwen yo abòde, minis la pale de operasyon ki vize akonpaye Ayisyen k ap retounen sòti nan Repiblik Dominikèn. Se yon efò kote Leta ansanm ak òganizasyon sosyete sivil ap travay pou asire repatryasyon an fèt san abi, epi ak respè pou dwa moun.
Pandan konferans lan, jounalis yo te gen opòtinite poze kesyon dirèk bay otorite yo. Yon eleman kle nan misyon “Madi Nasyon an” ki se ogmante transparans ak rapwoche gouvènman an ak popilasyon an. Nan yon moman kote anpil Ayisyen ap viv ensekirite ak difikilte sosyal, enfòmasyon klè ak angajman konkrè tounen esansyèl.
